กิสฺสตฺถายาติ ฯ อนาคตานํ ภนฺเต ปิปาสานํ ปหานาย ปฏิยตฺตํ โหตีติ ฯ อตฺถิ
มหาราช อนาคตา ปิปาสาติ ฯ อตฺถิ ภนฺเตติ ฯ ตุมฺเห โข มหาราช อติปณฺฑิตา
เย ตุมฺเห อสนฺตานํ ปิปาสานํ ปฏิพาหนตฺถาย ปฏิยาเทถาติ ฯ ภิยฺโย อุปมํ
กโรหีติ ฯ ตํ กึ มญฺญสิ มหาราช ยทา พุภุกฺขิโต ภเวยฺยาสิ ตทา ตฺวํ เขตฺตํ กสาเปยฺยาสิ
สาลึ วปฺเปยฺยาสิ ยวํ โรเปยฺยาสิ ภตฺตํ ภุญฺชิสฺสามีติ ฯ น หิ ภนฺเต ปฏิกจฺเจว
ตํ ปฏิยตฺตํ โหตีติ ฯ กิสฺสตฺถายาติ ฯ อนาคตานํ พุภุกฺขานํ ปฏิพาหนายาติ ฯ อตฺถิ
ปน มหาราช อนาคตา พุภุกฺขาติ ฯ อตฺถิ ภนฺเตติ ฯ ตุมฺเห โข ปน มหาราช
อติปณฺฑิตา เย ตุมฺเห อนสฺตานํ พุภุกฺขานํ ปหานาย ตํ ปฏิยาเทถาติ ฯ กลฺโลสิ
ภนฺเต นาคเสนาติ ฯ

อนาคตปญฺโห ตติโย ฯ

ราชา อาห ภนฺเต นาคเสน กีวทูโร อิโต พฺรหมฺโลโกติ ฯ ทูโร โข มหาราช
อิโต พฺรหฺมโลโก กูฏาคารมตฺตาปิ เสลา ตมฺหา ปติตา อโหรตฺเต อฏฺฐจตฺตาฬีส-
โยชนสหสฺสานิ ภสฺสมานา จตูหิ มาเสหิ ปฐวิยํ ปติฏฺฐเปยฺาติ ฯ ภนฺเต นาคเสน
ตุมฺเห ภณถ เสยฺยถาปิ นาม พลวา ปุริโส สมฺมิญฺชิตํ วา พาหุํ ปสาเรยฺย ปสาริตํ
วา พาหุํ สมฺมิญฺเชยฺย เอวเมว อิทฺธิมา ภิกฺขุ เจโตวสิปฺปตฺโต ชมฺพูทีเป อนฺเตรหิโต
พฺรหฺมโลเก ปาตุภเวยฺยาติ เอตํ วจนํ น สทฺทหามิ เอวมฺปิ สีฆํ ตาว พหูหิ โยชนาสตานิ
คจฺฉิสฺสตีติ ฯ เถโร อาห กุหึ ปน มหาราช ตว ชาติภูมีติ ฯ อตฺถิ ภนฺเต อลสณฺโฑ
นาม ทีโป ตตฺถาหํ ชาโตติ ฯ กีวทูโร มหาราช อิโต อลสณฺโฑ โหตีติ ฯ อตฺถิ
ภนฺเต ทฺวิมตฺตานิ โยชนสตานีติ ฯ อภิชานาสิ นุ ตฺวํ มหาราช กิญฺจิเทว กรณํ กริตฺวา
สรสีติ ฯ อาม ภนฺเต สรามีติ ฯ ลหุํ โข ตฺวํ มหาราช คโตสิ ทฺวิมตฺตาณิ
โยชนสตานีติ ฯ กลฺโลสิ ภนฺเต นาคเสนาติ ฯ

ทูรพฺรหฺมโลกปญฺโห จตุตฺโถ ฯ

ราชา อาห ภนฺเต นาคเสน โย อิธ กาลกโต พฺรหฺมโลเก อุปฺปชฺเชยฺย
โย อิธ กาลกโต กสฺมิรนคเร อุปฺปชฺเชยฺย โกปิ จิรตรํ โกปิ สีฆตรนฺติ ฯ เถโร อาห
สมกํ มหาราชาติ ฯ อุปมํ กโรหีติ ฯ กุหึ ปน มหาราช ตว ชาติภูมีติ ฯ
อตฺถิ ภนฺเต กาลสิรคาโม ตตฺถาหํ ชาโตติ ฯ กีวทูโร มหาราช อิโต กาลสิรคาโม